மழை வருது....

மழைவருது மழைவருது ஓடியாங்க
மண்நனைந்து மணம்வருது ஓடியாங்க

கோழிக்குஞ்சு நனைகிறதேக் கூட்டியாங்க
குளிரடிக்கும் பத்திரமாக் காத்துவையுங்க

குருவியெல்லாம் குளிக்கிறதேக் கூடவாங்க
அருவிபோல அகமகிழ ஓடியாங்க

கைகோர்த்து மழையிலாட ஓடியாங்க
வைகைந்தி தெருவிலோட ஆடவாங்க

காகிதத்தில் கப்பல்விட ஓடியாங்க
காகத்தோடுக் கபடியாட ஓடியாங்க

தவளைகளின் ஜலதரங்கம் ரசிக்க வாங்க
தண்ணீர் படுக்கையிலே குதிக்க வாங்க

நிற்பதற்குள் மழையிலாட நீங்க வாங்க
நீலவான குடைகிழிந்தது ஓடியாங்க

காகம்

மூக்கை முன்னால் நீட்டி
முகத்தை ஆட்டி ஆட்டி
காக்கை ஒன்று வந்தது
கழுத்தை நீட்டி அழைத்தது




அம்மா திரும்பிய வேளை
அலகால் மீனைக் கொத்த
சும்மா பறந்து வந்தது
சுற்றித் திரும்பிச் சென்றது

சோறு வைக்க அம்மா
சாலையில் வந்து நின்றாள்
பார்த்து 'கா'கா' என்றாள்
பறந்து வந்ததுக் கூட்டமாய்

இனத்தைச் சேர்த்துக் கூட்டி
இறையை உண்ணும் காக்கை
குணத்தைக் கற்றுக் கொண்டால்
குறையே இல்லை வாழ்வில்

கை கழுவுவோம்

பாப்பா தம்பி ஓடிவா
பட்டே நீயும் ஓடிவா
அப்பா அம்மா சொல்கேட்டு
அவசியம் சுத்தம் பேணிவா

உணவு உண்ணச் செல்லுமுன்
ஒழுங்காய் கைகள் கழுவணும்
கழிவறை சென்று வந்தபின்
கழுவு கைகள் சோப்பாலே


உண்ட பின்னும் கழுவணும்

உணர்ந்தால் நன்மை உடலுக்கே
கண்ட இடத்தில் கைவைத்தால்
கிருமிகள் சேரும் அறிவாயே

கைகளில் அழுக்குச் சேர்ந்தாலோ
கட்டாயம் உடலுக்கு ஆபத்து
பையில் காசு இருந்தாலும்
பாப்பா சுத்தம் அவசியம்

அழுக்கு சேர்தல் குற்றமே
அதனால் நோய்கள் சேருமே
ஒழுக்கம் சுத்தம் பேணுதல்
உணர்ந்தால் வாழ்நாள் கூடுமே

கட்டியக்காரன்

முதன் முதலாய் திரை விலக்கி
முகத்தைக் காட்டுவான்
விதவிதமாய் உடை உடுத்தி
வேடம் கட்டுவான்
கட்டியக்காரன் மக்களோடு
கலந்துப் பழகுவான்
தொட்டில் பிள்ளை மகிழவும்
ஜோக்குகள் சொல்லுவான்

வந்த வேடம் கதையறிய
விளக்கத்தைக் கேட்பான்
தந்தனத்தோம் பாட்டுப்பாடித்
தாளத்தை அடிப்பான்
எந்த வேடம் என்றாலும்
எளிதில் மாறுவான்
சொந்த மாகப் பாட்டுப்பாடி
சோகத்தைக் கலைப்பான்

சிரிப்பாலே மக்களை எல்லாம்
சிந்திக்க வைப்பான்
குறிப்பாக நாட்டு நடப்பை
கிண்டலும் செய்வான்

பசு

சந்தைக்குப் போன அப்பா
சாயங்காலம் வந்தார்
பந்தை போட்டு நானும்
பார்க்க ஓடி வந்தேன்

கையில் பசு மாடு
கழுத்தில் மணி மாலை
பையில் காசு இல்லை
பார்க்க அழகு கொல்லை

மாதம் சில ஆனதும்
மழலைக் கன்றை ஈன்றது
கீதம் பாடி ஆடினோம்
கன்றை துரத்தி ஓடினோம்

பாலைக் கொடுத்தது பசுமாடு
பரவசம் கொடுத்தது கன்றுக்குட்டி
நாளும் மகிழ்ச்சிக் கொண்டாட்டம்
நடக்குது கன்றோடு தொடரோட்டம்

சைக்கிள்

மூன்று சக்கர வண்டி

மிதித்தால் ஓடும் வண்டி

வண்ணம் பல இருக்கும்

வளைந்து நெளிந்து ஓடும்

பாட்டுப் பாடும் வண்டி

பரிசாய் வந்த வண்டி

வீட்டில் கூட ஓட்டலாம்

விளையாடி நாமும் மகிழலாம்

யாழினி

எங்கள் பாப்பா யாழினி

இனிய பாப்பா யாழினி

திங்கள் விரும்பும் யாழினி

தினமும் படிக்கும் யாழினி

எங்கள் செல்லம் யாழினி

எளிமை போற்றும் யாழினி

தெங்கின் இனிமை யாழினி

தேனின் வலிமை யாழினி