மாட்டு வண்டி

கடகடவென்றே உருண்டு ஓடும்
கட்டை மாட்டு வண்டி-இது
காளை மாட்டு வண்டி

தடதடவென்றே உருண்டு ஓடும்
தமிழர் மாட்டு வண்டி-இது
தாவும் மாட்டு வண்டி

இலாடம் பூட்டிய காளை இழுக்கும்
இரட்டை மாட்டு வண்டி-இது
விரட்ட பறக்கும் வண்டி

மரச் சக்கரம் இரும்பைப் போர்த்தி
மாடு இழுக்கும் வண்டி- இது
காடும் கடக்கும் வண்டி

நுகத்தடிப் பூட்ட நோஞ்சான் மாடும்
நொண்டி இழுக்கும் வண்டி- இது
சண்டி மாட்டு வண்டி

பொங்கல்

புதுப்பானை வைத்திடுவோம் பொங்கலோ பொங்கல்
புத்தரிசி இட்டிடுவோம் பொங்கலோ பொங்கல்
கதிரவனை வணங்கிடுவோம் பொங்கலோ பொங்கல்
களித்து நாங்கள் மகிழ்ந்திடுவோம் பொங்கலோ பொங்கல்

மாடுகளை மதித்திடுவோம் பொங்கலோ பொங்கல்
மாக்கோலம் போட்டிடுவோம் பொங்கலோ பொங்கல்
பாடுபட்ட உழவர்களைப் பொங்கலோ பொங்கல்
பாராட்டி வாழ்த்திடுவோம் பொங்கலோ பொங்கல்

பெரியோரை வணங்கிடுவோம் பொங்கலோ பொங்கல்
பெற்றிடுவோம் ஆசிகளை பொங்கலோ பொங்கல்
வறியோர்க்கு வழங்கிடுவோம் பொங்கலோ பொங்கல்
வயல்வெளியை தொழுதிடுவோம் பொங்கலோ பொங்கல்

கரும்புண்டு களித்திடுவோம் பொங்கலோ பொங்கல்
கவலையின்றி கூடிடுவோம் பொங்கலோ பொங்கல்
பிரிவினைகள் இல்லாமல் பொங்கலோ பொங்கல்
பிறர்மகிழ சேர்ந்திடுவோம் பொங்கலோ பொங்கல்

கடை

புளியமர நிழலிலே
பூரணிப் பாட்டிக் கடையிலே
இட்டிலி வடையும் விற்கிறார்
இன்பமாய் வாங்கி உண்ணலாம்

எண்ணெய் அதிகம் இல்லாமல்
எந்த சாயமும் சேர்க்காமல்
மண்ணைச் சார்ந்த உணவுகள்
மணக்க மணக்கக் கிடைக்குமே

பயறு கிழங்கு அவித்தவை
பழங்கள் பலவும் அரியவை
வயிறு நிரம்ப உண்ணலாம்
வாராது நோய்கள் திண்ணமாம்

ஆவியல் வெந்த கொழுக்கட்டை
அரிசிமாவுப் புட்டுவகை
அனைவரும் உண்டு மகிழலாம்
அன்பாய் பாட்டியை வணங்கலாம்

சூறாவளி

சுத்திச் சுத்திக் காத்தடிக்குது
சூறா வளிக் காத்தடிக்குது
கத்திக் கத்திக் காக்கைகளும்
கண்ட திசையில் கண்மறையுது

தென்னை மரங்கள் நாணலைப்போல்
தேகம் வலைந்து ஒடியுது
பண்ணை வயலின் நெற்கதிர்கள்
பாய்ந்து தூரம் பறக்குது

ஓலைக் குடிசை காலியாகுது
ஓட்டு வீடும் ஓட்டையாகுது
ஆல மரமும் அடிசாயுது
ஆக மக்கள் அலைபாயுது

படகும் பறந்து கரையேகுது
பலா வாழை மரம் சாயுது
விடாது புயலும் விரட்டுது
விழிப்பாய் இருப்பது நல்லது.

யாழினி

அம்மா அப்பா சொல்கேட்டு
அழகாய் பள்ளிச் சென்றிடுவேன்
சும்மா சோம்பிக் குந்தாமல்
சுறுசுறுப் பாக ஆடிடுவேன்

நாளும் குறளைப் படித்திடுவேன்
நாட்டு நடப்புகள் அறிந்திடுவேன்
கேளிர் சேர்ந்தே வாழ்ந்திடுவேன்
கேள்விகள் கேட்டே தெளிந்திடுவேன்

கூண்டுக் கிளியாய் இல்லாமல்
குவலயம் சுற்றி வந்திடுவேன்
ஈன்ற தாயை வணங்கிடுவேன்
என்றும் தந்தை மதித்திடுவேன்

பாட்டும் கூத்தும் கற்றிடுவேன்
பழந்தமிழ் கலைகள் காத்திடுவேன்
வாட்டும் வறுமை சூழ்ந்தாலும்
வாழ்வில் நேர்மை கடைபிடிப்பேன்

உழவன்

ஏரைக் கொண்டு நிலம் உழுவான்
எல்லோ ருக்கும் உணவ ளிப்பான்
பாரை உயர்த்த உழைத்திடுவான்
பட்டினி யின்றிக் காத்திடுவான்

காலைக் கருக்கலில் எழுந்திடுவான்
கலப்பை தோளில் சுமந்திடுவான்
ஓலைக் குடிசையில் வாழ்ந்தாலும்
ஓயாமல் உழைப்பை ஈந்திடுவான்

கால்நடைக் காத்து மகிழ்ந்திடுவான்
கவலை மறந்தே வாழ்ந்திடுவான்
தோல் கருப்பாக இருந்தாலும்
தூய உள்ளம் பெற்றிருப்பான்

உழவர் உழைப்பை மதித்திடுவோம்
உண்மை அன்பால் வாழ்த்திடுவோம்
மழையைப் போலே பலன்கருதா
மான்பைப் போற்றி வணங்கிடுவோம்.

மண் பானை

குயவர் செய்த பானை
குளிர்ச்சி யான பானை
வயலின் சேற்றில் மணலை
கலந்து செய்த பானை

தண்ணீர் பிடித்து வைக்க
தமிழர் செய்த பானை
மண்ணின் கொடையாம் பானை
மக்கள் விரும்பும் பானை

இடுப்பில் பானை வைத்தே
இளைய பெண்டிர் போவார்
குடிப்பதற்கு தண்ணீர்
கொண்டு வந்தே சேர்ப்பார்

பானைத் தண்ணீர் குடித்தால்
பக்க விளைவே இல்லை
தேனைப் போன்ற நீரை
தினமும் குடித்து மகிழ்வோம்

பள்ளிக்கூடம்

நண்பர்கள் தோளில் கைபோட்டு
நானும் பள்ளிக்குச் சென்றிடுவேன்
நன்றாய் நானும் படித்திடுவேன்
நல்ல பேரை எடுத்திடுவேன்

சொல்லிக் கொடுக்கும் பாடங்களை
தொல்லை யில்லாமல் கேட்டிடுவேன்
மல்லிகைப் பூவின் மணம் போலே
மகிழ்ச்சி யாக ஏற்றிடுவேன்

படிக்காத பிள்ளைகள் படும்பாட்டை
பார்த்து நானும் படித்திடுவேன்
படித்து நானும் அறிவாலே
பலவுயர் தகுதிகள் அடைந்திடுவேன்

என்றன் வயதுப் பிள்ளைகளே
என்னோடு பள்ளிக்கு வாருங்கள்
நன்றாய் கல்விக் கற்றே நாம்
நாட்டை உயர்த்த உழைத்திடுவோம்

தமிழ்ப் பேசு

பாப்பா பாப்பா தமிழ்ப் பேசு
பச்சைக் கிளியைப் போல் பேசு
தம்பித் தம்பித் தமிழ்ப் பேசு
தாய் மொழி தானே நீ பேசு

அம்மா அப்பா எனச் சொல்லு
ஆங்கிலம் வேண்டாம் அயற்சொல்லு
மாமா அத்தை எனச் சொல்லு
மகிழ்ச்சி யாலே நீத் துள்ளு

வணக்கம் நன்றி எனச் சொல்லு
வாழ்வாய் தமிழ்போல் நீவென்று
இனிப் பென்றால்தான் நெஞ்சினிக்கும்
சிரிப் பென்றால்தான் களிப்பிருக்கும்

பனி யென்றால்தான் குளிரடிக்கும்
பாலென்றால் தான் பசிமறையும்
இனியும் இதைநீ மறவாதே
இனிய தமிழில் நீபேசு

ஆலமரம்

அடி பெருத்த ஆலமரம்
அழகு விழுது ஆலமரம்
கிளை படர்ந்த ஆலமரம்
கிளிகள் கொஞ்சும் ஆலமரம்

சிறிய விதையில் பிறந்த மரம்
பெருமரமாய் வளர்ந்த மரம்
சிறுவர் ஆட நிழல் தரும்
பெரியோர் கூட இடம் தரும்

விழுதில் ஊஞ்சல் ஆடலாம்
விளையாடி நாளும் மகிழலாம்
இலையில் சோறு உண்ணலாம்
இயற்கை அழகை பருகலாம்

ஊரில் உள்ளோர் கூடும் மரம்
உழைப்பவர் ஓய்வு எடுக்கும் மரம்
பாரில் பசுமை ஆலமரம்
பாலர் போற்றிப் பாடுவோம்

பாட்டு

அம்மா பாடும் பாட்டு
அழகான தாலாட்டு
அப்பா பாடும் பாட்டு
அறிவை வளர்க்கும் பாட்டு

அண்ணன் பாடும் பாட்டு
அச்சம் ஓட்டும் பாட்டு
அக்கா பாடும் பாட்டு
அன்பை கூட்டும் பாட்டு

தம்பி பாடும் பாட்டு
தமிழ் வெல்லப் பாட்டு
தங்கைப் பாடும் பாட்டு
தெங்கின் இனிமை பாட்டு

ஒன்றாய் சேர்ந்துப் பாடுவோம்
நன்றாய் சிரித்து ஆடுவோம்
கன்றாய் களித்து ஓடுவோம்
கவலை மறந்து கூடுவோம்