குடை

மரத்தைப் போலே நிழல்தருவாய்
மழையில் குளித்து ஆடிடுவாய்

கம்பிகள் கையாய் நீட்டிடுவாய்
நம்பிக்கை யோடே காத்திடுவாய்

வீட்டுக்குள் சென்றால் கைகட்டி
கூட்டுக்குள்அடங்கி முடங்கிடுவாய்

மழையும் கானல் ஆனதுவே
மழலையர் மகிழ்ச்சி போனதுவே

குடையே மழையில் நானாட
தடையாய் நீயும் இருக்காதே

உடையும் நனைந்தால் உலர்ந்திடுமே
நடையைக் கட்டு வீட்டுக்கு

வேண்டாம் கோபம் கோடையிலே
மீண்டும் வருவ1ய் காத்திடவே

தீபாவளி

தீபங்களின் பெருநாள்
தீபாவளித் திருநாள்

காலையிலே எழுந்து
தலையில் எண்ணெய் தேய்த்து

குளித்து புத்தாடை உடுத்தி
கும்பலாக உண்டு

பட்டாசு வெடித்து
பலகாரம் கொடுத்து

கொண்டாடும் திருநாள்
எந்நாளும் கரிநாள்

தித்திக்கும் திருநாள்
எத்திக்கும் மகிழ்நாள்

விளையாடு

ஓடி ஆடி விளையாடு
உடலும் வேர்க்க விளையாடு
ஆடிப் பாடி விளையாடு
அயர்ச்சி மறையும் விளையாடு

கூடிக் களித்தே விளையாடு
கும்ப லாக விளையாடு
சோடிச் சேர்ந்தே விளையாடு
சோம்பல் விரட்டி விளையாடு

வலிமை சேர்க்கும் விளையாட்டு
வாழ்நாள் கூட்டும் விளையாட்டு
எளிமைப் பயிற்சி விளையாட்டு
ஏற்றம் கொடுக்கும் விளையாட்டு

அந்தி வானம்

அந்தி வான அழகைப் பார்
சிந்தும் காட்சி இன்பம் பார்
மேற்கில் மறையும் சூரியன் பார்
ஈர்க்கும் வான விந்தைப் பார்
மேகம் போடும் கோலம் பார்
நாகம் படம் எடுக்கும் பார்
காடும் மலையும் நகரும் பார்
ஆடும் மாடும் மேயும் பார்
தங்கம் போலே மின்னும் பார்
மங்கும் ஒளியின் மகிமைப் பார்
வெள்ளி ஆற்றின் ஓட்டம் பார்
அள்ளிப் பருக மறையும் பார்
வான வில்லின் வண்ணம் பார்
காணக் காண இன்பம் பார்
கட்டணம் இன்றிக் காண்போம் வா
மொட்டை மாடியில் முன்னே வா

காடு

கூட்டமாக மான்களெல்லாம் குதித்து ஓடுது
ஆட்டம் போட்டு அழகுமயில்அன்பைக் காட்டுது
ஏட்டினிலேப் பார்த்தவுருவம் எதிரில் தெரியுது
கூட்டினிலேக் குயில்முட்டை காக்கை காக்குது

சீட்டெடுக்கும் கிளிவிடுதலை கீதம் பாடுது
மாட்டின் மீது காகம் ஏறி சவாரி போகுது
காட்டுராசா சிங்கமும்தான் முழக்கம் செய்யுது
நாட்டுமக்கள் நிலையுமிழ்ந்து நரி குதிக்குது

கூட்டமாக குரங்கெல்லாம் கிளையில் தாவுது
ஓட்டமாக ஓடிமுயலும் ஒளிந்து கொள்ளுது
காட்டுநாயும் வேட்டையாட பாய்ந்து ஓடுது
பாட்டுப்பாடி பறந்துகுயிலும் மரத்தில் மறையுது

ஆட்டுமந்தை அணிவகுத்து அழகாய் செல்லுது
காட்டுயானை வீரன்போல் நடைந டக்குது
ஈட்டியிறை விருப்பம்போல் எல்லாம் கொள்ளுது
வீட்டுப்பிள்ளை அறிந்துகொண்டால் எல்லாம் நல்லது

பிறந்த நாள்

பாப்பாவுக்குப் பிறந்த நாள்
பாட்டுப்பாடி மகிழும் நாள்
அப்பா அம்மா நண்பர்கள்
அன்பாய் வாழ்த்தும் பொன்னாள்

கேக்கு வெட்டித் தோழியர்
கேலிப் பேசல் தவிர்த்தாள்
பாக்கு இடிக்கும் பாட்டியின்
பாச வாழ்த்தைப் பெற்றாள்

அனாதை இல்லம் சென்றாள்
அவரோடு உணவு உண்டாள்
வீணா காமல் நேரம்
விளையாடி மகிழ்ந்தாள்

பிறந்த நாளில் எளியோர்
பசியைப் போக்கும் பழக்கம்
சிறந்த தொண்டின் தொடக்கம்
சிறுவர் சிறுமியர் உணர்வோம்

பூக்கள் போலச் சிரிப்போம்
பூமிச் சூட்டைக் குறைப்போம்
ஊக்கம் கொண்டு உழைப்போம்
உயர்வை அடைய நினைப்போம்

கோலம்

விடியற் காலைப் பொழுதில்
வாசலில் தண்ணீர் தெளித்து
நொடியில் பெருக்கிக் கூட்டி
நோண்பாய் கோலம் போடுவாள்

வரிசை யாகப் புள்ளி
வாஞ்சை யோடு வைப்பாள்
அரிசி மாவில் கோலம்
அழகாய் அக்கா இடுவாள்

தரையில் பூத்த பூவாய்
தோன்றும் அழகு கோலம்
நிறைந்த இன்பம் கொடுக்கும்
நின்று பார்க்கத் தூண்டும்

எறும்பு ஊர்ந்து வந்து
எடுத்து மாவை உண்ணும்
விரும்பி மகளிர் எப்போதும்
வியந்து போடும் கோலம்

நிலாவே வா

குளிர்ந்த நிலவே வாராய்
குழந்தை மகிழ வாராய்
நெளிந்த நீரில் நீந்தும்
திங்கள் படகே வாராய்

நெளியும் பாம்பாய் மேகம்
நின்னைத் தீண்ட ஏகும்
வளியும் விலக்கப் பொலிவாய்
வனப்பு நிலவே வாராய்

தேய்ந்து வளர்ந்து வருவாய்
தினமும் புதுமைப் புரிவாய்
ஆய்ந்து அறிந்து உன்னில்
அடுக்ககம் கட்ட முயல்வார்

ஓய்தல் இன்றி நீயும்
உலகைச் சுற்று கின்றாய்
காய்தல் உவத்தல் இன்றி
கடமை செய்வாய் வாராய்

மரம்

மண்ணில் வளரும் நிழற்குடை
விண்ணின் நண்பன் மழைக்குடை
தண்ணீர் உறிஞ்சி வளர்ந்திடும்
கண்ணில் குளுமை வழங்கிடும்

நச்சுக் காற்றை சுவாசிக்கும்
நல்லக் காற்றை வெளியிடும்
உச்சி நோக்கிச் சென்றிடும்
உயர்வை நமக்கு போதிக்கும்

கிளைகள் அசைத்துப் பேசிடும்
கிளிகள் அமர்ந்தால் பழந்தரும்
இலைகள் பச்சயம் தயாரிக்கும்
இனிதாய் மரமும் வாழ்ந்திடும்

வேர்கள் பரப்பி நின்றிடும்
வேற்றுமை இன்றி நிழல்தரும்
ஊர்கள் முழுதும் வளருங்கள்
உலகம் செழிக்க உதவுங்கள்

குயில்

குயிலின் வண்ணம் கருமை
குரலோ நல்ல இனிமை
பயிலும் பிள்ளை விரும்பும்
பாடல் என்றும் கரும்பு

தோற்றம் அழகு இல்லை
ஏற்றம் இசையின் எல்லை
மாற்றம் வேண்டி நாட்டில்
மனிதர் திருந்தக் கூவும்

உச்சிக் கிளையில் அமர்ந்து
உணர்வுத் தூண்டப் பாடும்
குச்சு வீட்டுக் குடிகளும்
கூடி மகிழப் பாடும்

கனக சுப்பு ரத்தினம்
கண்டு வியந்தக் குயிலே
மனத்தில் மாசு இல்லா
மக்கள் விரும்பும் குயிலே

மரக்குதிரை

நேராய் நிற்கும் குதிரை
நெஞ்சு நிமிர்ந்த குதிரை
சீராய் ஆட்டி விட்டால்
சீறிப் பாயும் குதிரை

நின்ற இடத்தில் ஓடும்
நெஞ்சம் மகிழ ஆடும்
தொன்று தொட்டு குழந்தை
துயர் விரட்டும் குதிரை

பாப்பா தம்பி சேர்த்து
சோக்காய் சுமக்கும் குதிரை
தோப்பும் துறவும் போகும்
தூர தேசம் போகும்

ஒரே இடத்தில் நின்றே
உலகைச் சுற்றும் குதிரை
தரையில் டக் டக் என்றே
தாளம் போட்டு ஓடும்

தேர்வு

தேர்வு நேரம் நெருங்குது
தேவை நமக்கு கவனமே
சோர்வு நீக்கிப் படிக்கணும்
சுறுசுறுப்பாய் இருக்கணும்

கண்ட இடத்தில் சுற்றாமல்
கவனம் சிதறிப் போகாமல்
நன்றாய்ப் பாடம் படிக்கணும்
நல்ல மதிப்பெண் எடுக்கணும்

படித்தப் பாடம் மறந்ததா
பயத்தை விட்டுப் படித்திடு
அடுத்து நினைவில் நிறுத்திடு
ஆண்டுத் தேர்வை வெண்றிடு


அச்சம் தேவை இல்லையே
அனைத்தும் முயன்றால் முடியுமே
மெச்சும் படி உயரலாம்
மேன்மை பெற்று வாழலாம்

ஒழுக்கம்

காலை வேளை மலங்கழிக்க
கால்நடை போலே செல்லாதே
சாலை ஓர சாய்க்கடையில்
சர்ரென சிறுநீர் கழிக்காதே

கழிவறை ஒழுக்கம் கற்றுக்கொள்
கவலை உனக்கிலை ஒத்துக்கொள்
விழிப்பாய் இருப்பாய் எப்போதும்
வியாதிகள் அண்டாது உன்னிடமே

கூடி வாழ்தல் நன்மையே

மேனகா; கோடி வீட்டுக் குப்பம்மா
கோழி எச்சம் நாறுதே
ஆடு மாடு சாணமும்
இப்படி இறைந்து கிடக்குதே

குப்பம்மா; மாடி வீட்டு மேனகா
மாடும் ஆடும் உசுருதான்
'போடி'கோழிக் குஞ்சுகள்
பொழுது முழுதும் மகிழ்வுதான்

மேனகா; வீட்டில் அறைகள் இல்லையே
விளக்கும் கூட இல்லையே
ஆட்டை மாட்டைக் கட்டியே
அசிங்கம் பண்ணல் நியாயமா?

குப்பம்மா; அறைகள் தேவை இல்லையே
அன்பு ஒன்றேப் போதுமே
கூரை வீட்டில் வாழ்ந்தாலும்
கூடி வாழ்தல் நன்மையே